ஓட்டமாவடி நௌவ்பலிடமிருந்து கணக்கறிஞர் றியாழுக்கு திறந்த மடல்.....!!!

அஸ்ஸலாமு அலைக்கும் சகோதரர் றியாழ் அவர்களே  இன்னும் நான் உங்களை நேரடியாக சந்தித்ததுமில்லை இருந்தும்

உங்களுக்கு இப்படியொரு கடிதம் எழுத வேண்டுமென்றும் நான் நினைத்திருக்கவுமில்லை. கடந்த பொதுத் தேர்தலில் நீங்கள் வேட்பாளராக ஸ்ரீ லங்கா முஸ்லிம் காங்கிரஸில் போட்டியிட்டு துரதிர்ஷ்டவசமாக நீங்கள் தோல்வியினை சந்தித்த போதும் உங்களுக்கு தேசியப்பட்டியல் தருவதாக முஸ்லிம் காங்கிரஸின் தலைமை வாக்குறுதியளித்த போது நான் அதனை தற்போதைய பிரதமர் ரணில்விக்கிரமசிங்க அவர்கள் யுவதிகளுக்கு சுவிங்கம் கொடுத்த கதை போலாகுமென்று அப்போதே சொல்லியிருந்தேன். 

இருந்தும் உங்களைப்போன்ற ஒழுக்கமிகுந்த ,கற்றறிந்த இளைஞர் ஒருவர் இதுவரையிலும் கல்குடாத்தொகுதியில் முஸ்லிம் காங்கிரஸ் வேட்பாளராக இருந்திருக்கவில்லை என்றொரு சந்தோஷமும் என்மனதில் இல்லாமலில்லை. 

இவ்வளவு காலமாக தேசியப்பட்டியல் உங்களுக்கு தருவதாக சொல்லப்பட்ட கதை பொய்யாகிப்போன ஒரு சந்தர்ப்பத்திலும்,கல்குடாத் தொகுதிக்கான குடிநீர் திட்டத்தில் நீங்கள் முழுமனதுடன் முயற்சி செய்து அதனை ஆரம்பித்து வைக்கின்ற ஒவ்வொரு சந்தர்ப்பத்திலும் கிழக்கு முதலமைச்சர் அதனை தடுத்து நிறுத்தி அவருடைய அபிவிருத்தி திட்டம் போன்று அடிக்கல் நாட்டவருவதும் தென்னிந்திய சினிமாப் படங்களில் வடிவேலின் நகைச்சுவைக் காட்சிகளுக்கே சவாலாகிப் போய்விடுமோ என்ற அச்சமும் என்னிடம் இருந்து வருகின்றது. 

றியாழ், அவர்களே...!!!  நீங்கள் முஸ்லிம் காங்கிரஸின் அரசியல் அதியுயர்பீட உறுப்பினராக இருக்கின்ற சந்தர்ப்பத்திலும் அதே கட்சியின் உபதலைவர் அல்லது மாகாண முதலமைச்சர் எட்டி உதைக்கின்ற சந்தர்ப்பத்தில் நீங்கள் முஸ்லிம் காங்கிரஸின் தலைவரிடம் அதனை பகிரங்கமாக முறையிட்டும் அந்த தலைமையினால் அதனை கட்டுப்படுத்த முடியாமல் மூச்சுத்திணறினால் நீங்கள் ஏன் தொடர்ந்தும் அரசியல் அதியுயர்பீடத்தில் இருக்க வேண்டும்?

தன்னுடைய திறமையினால் நல்லதோர் தொழிலில் கொழுத்த சம்பளத்துடன் இருக்கும் நீங்கள் உங்களுக்கு வாக்களித்த மக்களுக்கோ அல்லது உங்களுக்கோ எவ்வித  பிரயோசனமுமற்ற அதியுயர்பீடத்தில் நீங்கள் ஏன் இருக்க வேண்டும்? 

 பொதுத்தேர்தல் முடிந்து இவ்வளவு காலப்பகுதியில் முஸ்லிம் காங்கிரஸிற்காக தங்களை அர்ப்பணித்த ஒரு இளைஞனுக்காவது ஒரு அரசாங்க நிறுவனத்தில் முஸ்லிம் காங்கிரஸின் தலைவரினால் பிஓன் தொழில்கூட வழங்கப்பட்டுள்ளதா?  

இப்பகுதியில் முஸ்லிம் காங்கிரஸிற்கு அளிக்கப்பட்ட  9500 வாக்குகளுக்கு கிடைத்த ஒரேயொரு தேசியப்பட்டியல் ஒரு ஆசிரியரும்,அதிபருமான சகோதரர் சமீம் அவர்களை தாருஸ் ஸலாத்தில் ஒரு காரியாலய உதவியாளராக நியமித்ததுதான்  எமக்கு கிடைத்த சர்வதேச பட்டியலாகும். அதனை நாங்களும் சகோதரர் சமீம் அவர்களும் ஆசைக்காக ஆங்கிலத்தில் coordinator என்று சொல்லி வருகின்றோம்.  

கணக்கறிஞர் றியாழ் அவர்களே....!!! ஏறாவூர் பிரதேச அரசியல் வாதிகளின் காலணித்துவ ஆட்சியின் கீழ் கல்குடாப் பிரதேசம் இருக்கின்றது என்றொரு வெகுளித்தனமான கோட்பாட்டிற்கும் சிந்தனைக்கும் முடிவு கட்டவேண்டும். 

அல்லாஹ்வுக்காக நீங்கள் முஸ்லிம் காங்கிரஸின் அதியுயர் பீடத்திலிருந்து விலகி ஒரு சாதாரண அங்கத்தவராக இருந்துவிடுங்கள். தாருஸ்ஸலாத்தில் உங்களை ஏமாற்றுவதற்காக வழங்கப்பட்டுள்ள அறையிலிருந்து வெளியேறிவிடுங்கள் தொடர்ந்தும் முஸ்லிம் காங்கிரஸின் தலைமை இந்த கல்குடாத்தொகுதியின் வாக்குகளை சூரையாடி இம்மக்களுக்கே வேட்டுவைக்கும் அசிங்கத்திற்கு இறுதிவேட்டுவைக்கும் ஒரு போராளியாக நீங்கள் மாற்றம் பெறுங்கள்.

M.H.M.NAWFAL

ODDAMAVADY 

SHARE THIS