2015-08-05 05:39:56 Zacky Fouz
ஐ.எஸ் வன்முறைக் குழுவின் உள்ளக இரகசியங்கள் தொடர்ந்தும் மர்மமாகவே காணப்படுகின்றன. அதன் தனிப்பட்ட தீர்மானங்கள் மற்றும் நிகழ்ச்சி நிரல்களைப் பற்றி யாருக்கும் தெரியாது.
இந்த பரம இரகசியத்தை வெளிப்படுத்தாது , வெறும் "இஸ்லாமிய நெறி முறைகளை அடிப்படையாகக் கொண்ட ஆட்சி" என்ற பெயரில் முஸ்லிம் உலக இளைஞர்களை கவரும் கவர்ச்சியான பிரச்சார உத்தியை ஐ.எஸ் வன்முறைக் குழு முடுக்கி விட்டுள்ளது.
ஆனால், அதன் உட்கட்டமைப்போடு தொடர்புபட்ட பலரின் நேர்காணல்கள் , அனுபவங்கள் மற்றும் ஐ.எஸ் அமைப்பின் பிரதான புள்ளிகளுடன் ஒன்றாகச் செயற்பட்ட நபர்களின் கருத்துக்கள் என்பன ஐ.எஸ் வன்முறையாளர்களின் வேறோர் கறுப்புப் பக்கத்தை அடையாளப்படுத்துகிறது.
இன்னும், அவ்வமைப்பின் இராணுவத் திட்டமிடல்கள் , தாக்குதல்கள் , ஆளணி முகாமைத்துவம் என்பன ஐ.எஸ் போராளிகளின் சுயநல இரகசிய நிகழ்ச்சி நிரல்களுக்கு உதவி செய்யும் முகமாகவே பயன்படுத்தப்படுகிறது என்ற பயங்கர உண்மையையும் அத்தகைய நபர்களின் கருத்துகள் தெளிவுபடுத்துகின்றன.
ஐ.எஸ் வன்முறைக்குழுவின் படைகளில் நான்கு வகையான போராளிகள் தொழிற்படுகின்றனர். முதலாவது தரத்தில் , ஏற்கனவே சதாம் ஹுசைனின் இராணுவத்தில் உளவுப் புலானாய்வுத் துறை, ஆளணி முகாமைத்துவம் மற்றும் பாதுகாப்புத் துறைத் தீர்மானங்கள் போன்றவற்றில் அனுபவம் பெற்ற பாத் கட்சி உறுப்பினர்கள் இருக்கின்றனர்.
இரண்டாம் தரத்தில், 2003 – 2008 இடைப்பட்ட காலப் பிரிவில் அமெரிக்கா இராணுவத்தால் கைது செய்யப்பட்ட அல்கைதா இயக்கத்தின் வன்முறைச் சிந்தனைப் பின்புலத்தைக் கொண்டவர்கள் இடம்பெற்றுள்ளனர்.
மூன்றாம் தரத்தில், ஈராக் மீதான அமெரிக்க ஆக்கிரமிப்பை எதிர்த்துப் போராடியதால் சிறைபிடிக்கபட்டு சித்திரவதைக்குட்படுத்தப்பட்ட இளைஞர்கள் உள்வாங்கப்பட்டுள்ளனர் . கடைசியாக, அதன் கவர்ச்சியான பிரச்சார உத்தியை நம்பி , ஈராக்கிற்கும் , சிரியாவிற்கும் இடம்பெயர்ந்த வெளிநாட்டு முஸ்லிம் இளைஞர்களையும் ஐ.எஸ். வன்முறைக் குழு உள்ளடக்கியுள்ளது.
பாதுகாப்பு, தேச நிர்வாகம் மற்றும் தாக்குதல் திட்டமிடல்கள் போன்ற ஐ.எஸ் வன்முறைக் குழுவின் பிரதான விவகாரங்களில் சதாம் ஹுசைனின் பாத் கட்சி ஆட்சியில் அனுபவம் பெற்ற உளவுப் புலானாய்வுத் துறை நிபுணர்களே முழுமையாக ஆதிக்கம் செலுத்துகின்றனர்.
கொடூரமான கொலைகள் , ஆட்டிலரி மற்றும் பாரிய அதிநவீன ஆயுதங்களை கையாளும் பயிற்சி என்பன இத்தகைய இராணுவ ஜனரல்களின் நேரடி கண்காணிப்பிலேயே இடம்பெறுகிறது.
இவர்களே உயர் மட்டத்தில் இருந்து கொண்டு ஐ.எஸ் வன்முறைக் குழுவின் விவகாரங்களை நேரடியாக இயக்கும் புள்ளிகளாகும். மறுபுறம், மவ்ஸூலிலிருந்து ரக்கா வரை பரந்து விரிந்துள்ள ஐ.எஸ் ஆதிக்க பிராந்தியத்தின் தலைவராக அபூபக்கர் அல் பக்தாதி என்பவர் அறிவிக்கப்பட்டார். ஆனால், இது வெறும் "பெயரளிவிலான நியமனம்" என்பதே ஐ.எஸ் வன்முறைக் குழுவின் உள்ளிருந்து வெளிவரும் உளவுத் துறைத் தகவல்கள் தெரிவிக்கும் கருத்தாகும். "அபூபக்கர் அல் பக்தாதி" என்ற போலி கலீபாவின் பின்புலத்தில் பாத் கட்சி இராணுவ ஜனரல்கள் தங்களது இரகசிய நிகழ்ச்சி நிரல்களுடன் ஐ.எஸ். யை இயக்கி வருகின்றனர்.
குறிப்பாக , அபூ அய்மன் அல் ஈராகி , அபூ அலி அல் அன்பாரி , அபூ அப்துர் ரஹ்மான் பய்லாவி , அபூ முஸ்லிம் அத்துர்க்மானி மற்றும் ஹாஜி பக்கார் போன்றவர்கள் அபூபக்கர் அல் பக்தாதியின் இரண்டாம் தரத்தில் ஐ.எஸ். வன்முறைக் குழுவை வழிநடாத்தும் நபர்கள் என நம்பகமான பல செய்தி மூலங்கள் உறுதிப்படுத்தியுள்ளன.
இவர்கள் அனைவரும் 1980கள் முதல் 2003 வரை சதாமின் இராணுவத்தில் பாதுகாப்புத் துறை திட்டமிடல்களில் மற்றும் பொருளாதாரத் தடை காலத்தில் கறுப்புச் சந்தையில் ஆயுதம் மற்றும் எண்ணெய் வியாபாரத்தில் ஈடுபட்டு தேர்ச்சி பெற்ற இராணுவ ஜனரல்களாகும்.
அதிலும் அபூபக்கர் அல் பக்தாதியுடன் ஐ.எஸ். இயக்கத்தை நிறுவுவதற்கு துணை புரிந்த மேஜர் ஜனரல் ஜாஹி பக்கார் ஒரு சுத்தமான மதச்சார்பற்ற தேசியவாதி. 1980-/87 காலப்பிரிவில் ஈரான் - ஈராக் போரின் போது முன்னணியில் நின்று ஈராக் படையை வழிநடாத்தியவர். இவரின் ஆலோசனையின் பெயரிலேயே அதிகமான பாத் கட்சி இராணுவ வீரர்கள் ஐ.எஸ். வன்முறைக் குழுவில் உள்வாங்கப்பட்டனர்.
இன்னும் ஹாஜி பக்கார் தெளிவாகவே தனது பதவி மோகத்தை தீர்த்துக் கொள்வதற்காக ஐ.எஸ். வன்முறையாளர்களுடன் இணைந்து கொண்டவர்.
அதேபோல், ஐ.எஸ். இன் சிரியா விவகாரங்களை நிர்வகிக்கும் அபூ அய்மன் அல் ஈராகி என்பவர் சதாம் ஹுசைனின் புலனாய்வுத் துறையில் பணியாற்றிய ஷீயா கொள்கை பின்புலத்தைக் கொண்ட பாத் கட்சி உறுப்பினர் என்பதும் குறிப்பிடத்தக்கது. ஏனைய ஜிஹாத் குழுக்களை மற்றும் அதன் உறுப்பினர்களை பலாத்காரமாக ஐ.எஸ். இயக்கத்தில் இணைய வைக்க முயற்சிப்பதும் இல்லாத போது கொடூரமாக கொலை செய்வதும் அபூ அய்மன் அல் ஈராகியின் சிறப்புத் தேர்ச்சியாகும்.
ஐ.எஸ். இன் இரண்டாம் மூன்றாம் தர உறுப்பினர்களுடன் எந்த உறவுகளையும் இத்தகைய மேல்மட்ட உறுப்பினர்கள பேணுவதில்லை. இவர்களை ஐ.எஸ். இன் கீழ்மட்டத்தில் போராடும் பல சிப்பாய்கள் சந்திக்க முற்பட்ட போது "அவர் உங்களுக்கு தெரியாத வேஷத்தில் உங்களோடு இருக்கிறார்" என்ற பதிலே அதிகமாக கூறப்படும்.
மேற்குறிப்பிட்ட அம்சத்தை ஐ.எஸ். வன்முறைக் குழுவின் கறுப்பு எஜன்டாக்களை கண்டு, அதிலிருந்து துருக்கிக்கு தப்பியோடிய "அபூ ஹம்ஸா" என்ற இளைஞன் நேர்காணலொன்றின் போது குறிப்பிடுகிறான். ஐ.எஸ். இன் சிரிய கிளையின் ஒரு பகுதிக்கு தலைவராக அபூ ஹம்ஸா நியமிக்கப்பட்டார்.
ஆனால், பல போது யாராலோ அவர் கட்டுப்படுத்தப்படுகிறார் என அபூஹம்ஸா உணர்திருக்கிறார். அத்தகையவர்களை அபூஹம்ஸா சந்திக்க முற்பட்ட போது, அச்சுறுத்தப்பட்டு பல நாட்கள் சிறையில் அடைக்கப்பட்டுள்ளார்.
இவ்வாறான ஐ.எஸ். இன் முதலாம் தர உறுப்பினர்களுக்கும் , இஸ்லாமிய கோட்பாடுகளுக்கும் எவ்வித சம்பந்தமும் இல்லை என்பதே அதன் உள்ளக இரசியங்களை ஆய்வு செய்யும் ஊடகவியலாளர்களின் கருத்தாகும். வெறுமனே, தமது அதிகார வெறியை தீர்த்துக் கொள்ளும் நோக்குடன் ஐ.எஸ். வன்முறைக் குழுவை இவர்கள் வழிநடாத்துகின்றனர். இதற்கான சிறந்த சான்று யாதென்றால், ஐ.எஸ். இன் மத்திய குழுவால் நியமிக்கப்படும் இராணுவ, நிர்வாக மற்றும் உளவுத் துறை தலைவர்களின் பின்னால் சதாமின் பழைய பாத் கட்சி இராணுவ ஜெனரல்களால் நியமிக்கப்படும் நிழல் கண்காணிப்பாளர்களும் நியமிக்கப்படுகின்றனர்.
இவர்களே யார்?, எப்போது ?, எங்கு ? , எதனை ? என்ற ஐ.எஸ். இன் போர்த் திட்டமிடல்களின் போதான மிக முக்கியமான இராணுவத் தீர்மானங்களை வழிநடாத்துவதாக "அபூ ஹம்ஸா" அடித்துத் சொல்கிறார். சுருக்கமாக, இந்நிலைமையை இப்படியும் வேறு வசனத்தில் கூறலாம். அதாவது, சதாம் ஹுசைன் பேசிய "அகன்ற அரபுத் தேசியவாதம்" என்ற கருத்தியலை விட "இஸ்லாமிய ஜிஹாத்" அல்லது " இஸ்லாமிய கிலாபத்" போன்றன தங்களது அதிகார வெறியை தீர்த்துக் கொள்வதற்கு காலத்திற்கு மிகப் பொருத்தமான கோஷங்கள் என பாத் கட்சி இராணுவ ஜனரல்கள் சிந்திக்கின்றனர்.
ஐ.எஸ். வன்முறைக் குழுவின் உயர் மட்டத்தில் ஆதிக்கம் செலுத்தும் இத்தகைய சதாம் ஆட்சி கால இராணுவ ஜனரல்களுக்கும், ஏனைய அல் கைதா ஈராக் போராட்ட குழுத் தலைவர்களுக்கும் இடையில் எத்தகைய தொடர்பு நிலவுகிறது என்பதனையும் சில உள்ளக உளவாளிகள் வெளிப்படுத்தியுள்ளனர். அதாவது, ஐ.எஸ். இன் இராணுவ பலம் மற்றும் பிராந்திய விஸ்தரிப்பு சுமுகமாக இடம்பெற வேண்டுமாக இருந்தால், இவ்வாறான பாத் கட்சி மதச்சார்பற்ற இராணுவ ஜனரல்களை வைத்திருப்பது அத்தியவசியம் என அல்கைதா ஈராக் பிரிவினர் நம்புகின்றனர்.
எனவே, எவ்வளவுதான் இஸ்லாத்தின் பெயரால் போலிக் கோட்பாடுகளை ஐ.எஸ். வன்முறைக் குழுவின் மதபோதகர்கள் பேசித் தீர்த்தாலும், ஐ.எஸ். படையில் அங்கம் வகிக்கும் பாத் கட்சி இராணுவ ஜனரல்களின் நடத்தையில் கை வைக்க அவர்கள் தயாராக இல்லை. இவ்விருசாரருக்கும் மத்தியில் "உடன்பாட்டுத் திருமணம்" (Marriage of Convenience ) நடைபெற்று விட்டதாக சில ஆய்வாளர்கள் எழுதுகின்றனர்.
அதேபோல், ஐ.எஸ். போராளிகளுக்கு மத்தியில் தீவிர வன்முறைச் சிந்தனைகள் மற்றும் கோட்பாடுகளை புகுத்தும் , பரப்பும் செயற்பாடுகளை திட்டமிட்டு முன்னெடுப்பதனூடாக, அதன் மேல்மட்ட உறுப்பினர்களின் கருப்பு எஜன்டாக்கள் இலகுவாக மறைக்கப்படுகின்றன.
அதனையே "ஐ.எஸ். இன் இராணுவப் படையில் வந்திணைந்து கொள்ளும் இளைஞர்களின் உணர்ச்சிப் பரவச நிலையின் காரணமாக , அவ்வியக்கத்தின் ஆழத்தில் தொழிற்படும் பாத் கட்சியினதும், அல்கைதா ஈராக்கின் தலைவர்களினதும் அரசுக்குள் அரசு (State within state) பற்றிய தகவல்கள் மறைக்கப்பட்டுவிட்டன" என ஐ.எஸ். வன்முறைக் குழுவுடன் பேச்சுவார்த்தைகளில் கலந்துகொண்ட "சிரியப் புரட்சியை நெறிப்படுத்தும் அமைப்பின்" தலைவர் ஹசன் இத்கிம் குறிப்பிடுகிறார்.
இன்னும், இத்தகைய பாத் கட்சி இராணுவ ஜனரல்களின் இரகசிய தீர்மானங்களுக்கு ஏற்ப அல் கைதா வன்முறைக் குழுவின் தலைவர்கள் இயங்குவதால், அதனோடு பேச்சுவார்த்தைகளில் ஈடுபடுவதிலும் பாரிய கஷ்டங்கள் காணப்பட்டதாக ஹசன் இத்கிம் தெளிவுபடுத்துகிறார்.
சிரியா மற்றும் ஈரான் உளவுத் துறைக்கும் ஐ.எஸ் அமைப்புக்கும் தொடர்பிருக்கிறதா?
மேற்சொன்ன கேள்விக்கான விடையை ஊகிப்பதற்கு கள நிலவரம் பற்றிய புரிதல் அவசியமானது. அதாவது, ஐ.எஸ். போராளிகள் "இஸ்லாமிய கிலாபத்" அல்லது " இஸ்லாமிய ஜிஹாத்" போன்ற கோஷங்களை இளைஞர்களின் உணர்வுகளை சூறையாடுவதற்காக போலியாக தூவி விட்டாலும் கூட, யதார்த்தத்தில் பிராந்தியத்தின் முழுச் சீரழிவிற்கும் காரணகர்த்தாவான அஸாதிற்கு எதிராக எவ்வித பாரிய தாக்குதல்களையும் நடாத்தியதில்லை.
சிரியாவில் ஐ.எஸ். அமைப்பு கைப்பற்றியுள்ள பெரும்பாலான நகரங்கள், ஆயுதக் கிடங்குகள் மற்றும் கொலை செய்த சிப்பாய்கள் என அனைத்தும் அஸாதிற்கு எதிராகப் போராடும் புரட்சிக் குழுக்களுடையதாகும்.
தற்போது சிரிய ஐ.எஸ். கட்டுப்பாட்டுப் பகுதியின் தலைநகராக அறிவிக்கப்பட்டுள்ள "ரக்கா" பகுதி புரட்சிப் படைகளின் கட்டுப்பாட்டிலேயே ஆரம்பத்தில் காணப்பட்டது.
அதாவது, அஸாதின் இராணுவத்தை அடித்து விரட்டி "ரக்கா"வை விடுவித்தவர்கள் மக்கள் புரட்சிப் படையினரே. ஆனால், அப்பிராந்தியத்தை விடுவித்துவிட்டு ஏனைய பகுதிகளை நோக்கி மக்கள் புரட்சிப் படையினர் நகர்ந்த சந்தர்ப்பத்தில் , விடுவிக்கப்பட்ட பிராந்தியங்களை ஐ.எஸ். வன்முறைக் குழு கைப்பற்றிக் கொண்டது. மறுபுறம், பஷர் அல் அஸாதை வீழத்துவதனை விடுத்து, "இஸ்லாமிய தேசத்தை விரிவுபடுத்தல்" என்ற பெயரில் , அஸாதோடு போராடும் ஏனைய ஆயுதப் பிரிவுகளை முடக்கும் கைங்கரியத்தையே ஐ.எஸ். வன்முறைக் குழு தொடர்ச்சியாக மேற்கொண்டு வருகின்றது.
அதற்காக கவர்ச்சிகரமான இஸ்லாமிய சுலோகங்களை ஐ.எஸ். வன்முறைக் குழு பயன்படுத்துகிறது. குறிப்பாக "புரட்சிப் படைகளின் பின்னால் துருக்கி, கட்டார் மற்றும் சவூதி அரேபியா போன்ற இஸ்லாமிய வழிகாட்டலைப் பின்பற்றாத நாடுகள் இருக்கின்றன.
எனவே புரட்சிப் படையினர் முர்தத்கள் (மார்க்கத்தை விட்டு வெளியேறியவர்கள்) ஆகும். மறுபுறம் , பஷர் அல் அஸாத் தெளிவான காபிர். அடிப்படையான காபிரோடு போராடுவதனை விட முர்தத்தோடு போராடுவதையே இஸ்லாம் வரவேற்கிறது. எனவே அஸாதோடு போராடுவதனை விட புரட்சிப் படையோடு போராடுவது அவசியமானது" என்பது ஐ.எஸ். மதபோதகர்ளின்வாதமாகும்.
இத்தகைய அறிவுக்குப்படாத வாதங்கள் மற்றும் அஸாதுக்கு எதிரான ஜிஹாத் குழுக்களை முடக்குவதனூடாக அவனை பலப்படுத்துதல் போன்ற ஐ.எஸ். இன் செயற்பாடுகள் , ஈரான் மற்றும் அஸாதின் புலானாய்வுத் துறைக்கும் , ஐ.எஸ். இன் மேல்மட்ட உறுப்பினர்களுக்கும் மறைமுகமான தொடர்பு காணப்படுகிறது என சில அரசியல் ஆய்வாளர்கள் முன்வைக்கும் பலமாக ஊகத்தை வலுப்படுத்துகிறது.
மூன்று அல்லது நான்கு தசாப்த காலம் புலானய்வுத் துறையில் தேர்ச்சி பெற்ற இராணுவ ஜனரல்களுக்கூடாக அஸாதினதும், ஈரானினதும் புலனாய்வுத் துறை ஐ.எஸ். இன் நாளாந்த விவகாரங்களில் தாக்கம் செலுத்தலாம் என அவர்கள் பலமாக வாதிக்கின்றனர். குறிப்பாக, பாத் கட்சி புலானாய்வுத் துறை நிபுணர்கள் ஐ.எஸ். இன் போலிக் கோட்பாடுகளால் கவரபட்டு வந்தவர்களல்ல. மாறாக, வெறும், பதவி , பணம் மற்றும் அதிகாரத்திற்காக இணைந்து கொண்டவர்களே.
எனவே, இவ்வாறான பலவீனத்தை அஸாதும் , ஈரானிய உளவுத்துறைத் தலைவரான காஸிம் சுலைமானியும் பயன்படுத்திக் கொண்டிருக்கக் கூடும்.
அதிலும், பாத் கட்சி உறுப்பினர்களாக இருந்து , பின்பு ஐ.எஸ். இன் மேல்மட்டக் குழுவில் அங்கம் வகிக்கும் ஷீயாக் கொள்கைப் பின்புலத்தைக் கொண்ட புலனாய்வுத் துறைத் தலைவர்களை விசுவாசமாக்கிக் கொள்ளும் இலக்கிலும் தெஹ்ரானும், டமஸக்கஸும் வெற்றி பெற்றிருக்கக் கூடும்.
இவையனைத்தும் களத்தில் சிரியப் புரட்சிக்கு சார்பாக பணியாற்றும் ஊடகவியலாளர்கள் முன்வைக்கும் பலமான ஊகங்கள். இவ்வூகத்தை நியாயப்படுத்தும் விதமாக சில கள மாற்றங்களும் நிகழ ஆரம்பித்துள்ளன. குறிப்பாக, கடந்த நான்கு வருடங்களில் முதல் தடவையாக துருக்கியின் விமானப் படை தற்போது ஐ.எஸ். இன் இராஜதந்திர இடங்களை தாக்கியழிக்க ஆரம்பித்துள்ளது.
அதாவது "அஸாதிற்கு முற்றுப் புள்ளி வைக்க வேண்டுமானால் , "இஸ்லாமிய கிலாபத்" என்ற போலி வேடத்தில் நடிக்கும் அவனது ஏஜன்டை தீர்த்துக் கட்ட வேண்டும்" என முடிவெடுத்துவிட்டது போல் துருக்கியின் சடுதியான இராணுவத் தீர்மானங்கள் தெரிவிக்கின்றன.
இறுதியாக, ஐ.எஸ். வன்முறைக் குழுவின் மேல்மட்டத்தின் செயற்பாடுகளின் மற்றொரு குரூர இராஜதந்திரத்தை பற்றியும் அங்கு ஊடுருவியுள்ள சில ஊடகவியலாளர்கள் வெளிப்படுத்தியுள்ளனர். அதாவது, ஐ.எஸ். அமைப்பினர் அதிகமான வெளிநாட்டு முஸ்லிம் இளைஞர்களை கவரும் நிகழ்ச்சி நிரல்களுக்கு அழுத்தம் கொடுக்கின்றனர்.
காரணம், உள்நாட்டு இளைஞர்களை போரில் முன்னணியில் நிறுத்த முடியாது. ஏனெனில், அவர்களில் அதிகமானவர்கள் இறப்பெய்தும் பட்சத்தில், மக்களின் அழுத்தங்களுக்கு முகங்கொடுக்க வேண்டி எற்படும். எனவே, முக்கியமான தற்கொலைத் தாக்குதல்களுக்கு மற்றும் படை நகர்வுகளில் முன்னணிப் படையில் வெளிநாட்டு சிப்பாய்களையே அதிகம் ஐ.எஸ். வன்முறைக் குழு பயன்படுத்துகிறது. இவர்களின் வாழ்வுக்கும் , மரணத்திற்கும் ஐ.எஸ். எந்த விதத்திலும் பொறுப்புச் சொல்லத் தேவையில்லை என ஐ.எஸ். மேல் மட்டம் நம்புகிறது.
எனவேதான், அரபு மொழி பேசும் இளைஞர்களை விட , ஆங்கில ,பிரான்ஸ் மற்றும் ரஷ்ய மொழியிலான முஸ்லிம் இளைஞர்களை இலக்கு வைத்து ஐ.எஸ். இன் பிரச்சார உத்திகள் தொழிற்படுகின்றன. வெளிநாட்டு இளைஞர்களை கவரும் நிகழ்ச்சிகளை மார்க்க மூலாம் பூசுவதற்காக அல்கைதா உறுப்பினர்களையும் , அவர்களது கருத்தியலால் ஆகர்சிக்கப்பட்ட சில மத போதகர்களையும் சூட்சுமமாக ஐ.எஸ். மேல்மட்டம் பயன்படுத்திக் கொள்கிறது.
Saturday, September 5, 2015
0 comments: